Rom 2 | GbrGAW | STEP | To, kpesun, ho cilo ge, ʼaza, ukwoyi nu n na daɓo n ya. Amma lapmi, ho zhin oza laifi da nuce. Sanu n ha ci n cei ge ɓa zhin aza nukwoyi nu, kwoi bmiya lo a gaba tata, ho da hohin tukwo ɓo nu ce, ntuge ho zhin aɓeye lo ce.

Romans 2

Tata Lo Nabye

1 To, kpesun, ho cilo ge, ʼaza, ukwoyi nu n na daɓo n ya. Amma lapmi, ho zhin oza laifi da nuce. Sanu n ha ci n cei ge ɓa zhin aza nukwoyi nu, kwoi bmiya lo a gaba tata, ho da hohin tukwo ɓo nu ce, ntuge ho zhin aɓeye lo ce. 2 Yi kpelo ge, Shekwoyi ɓei da wa woi zun aza kni n ɓa zhin aɓeye pya. 3 Ho gye ngye Shekwoyi ɓei da aza owa, Wo la hoi da fwa, hoi zhin aɓoho lo n hohin?

4 Hota gye lo shi Shekwoyi zhin hakuri n hoi m? Ko ho ta kula lo ma? Hota gye lon, esaye vinya woi pmi ho to woi tahon, woi gaho sa ha pmi avun wu ho a laifin. Wo wuho alheri deye ntu ge haye abui nu.

5 Amma, fyeta kna tnubua lo n, fye ye minagyi nukwoyi zhi fyehin ntu fye abugba kala kpe ɓo, n ge fyeta pmi avun wu of ye alaifin. Minagyi nyipyei ɓelo n Shekwoyi ɓei da anyi vinya wa. 6 Wo ɓei ga oza shi owa tnu-tnu a mu gawo n sun. 7 Wo ɓei ga aza n ɓa zhin Shekwoyi ɓeye n hakuri yi, Wye-wyei nyalo-nyalo nya, ɓai zan mwa-mwa n latu yi shin n wyewye yi nyalo-nyalo nyai nwo ganyi. 8 Ama wo ɓei ga aza tata n ɓa gni a papa n Shekwoyi gaiciya yi, ɓai zan-zan fi n na zokwo nukwoyi, aɓei ze Shekwoyi minagyi ya kpe ɓa. 9 – 10 Bugba wun, n na zhingye yi, ɓei bwa a Yahudiyi. Na a zayi n ɓato zhin a Yahudiyi m vinya, n ɓa gyi abye n ɓenukwoyi zhin yi. Amma aza nɓa vi wo ɓo, ɓa ɓei bwa mwa-mwa n bugba fu yi, ko Yahudiyi nu kwo aza nɓato zhin a Yahudiyim. 11 Ntuge Shekwoyi zhin zaho-zahoyi ɓo n tna awyekwo.

12 – 13 – 14 – 15 ^{▼▼The text of verses 12-Rom 2:15 has been merged.} Wo ɓei ta laifi aba n kwo nyi vinya. Wo ɓei ta ashan-gbayi, koda-yake, ɓato n Shekwoyi awyidna yi kashi lo n, gama nɓa bugba mi, ɓa kpe ɓe manayi yelo n nukwoyi. Shekwoyi awyidna kafi lo n ɓa bugba mi. Oɓa la-ami kwoi zunɓa kni. Ko kwoyi daɓa wa, Shekwoyi ɓei ta a Yahudiyi ntu ɓenukwoyi zhin ɓo, ntu ge ɓa n wo awyidna yi ka shi lo, ama to ɓai shi ɓa bwan. Ɓa kpe ɓe manayi ye, ama ɓata zhin kon. Ata ga aza gni-gni n ɓa kpeɓeye n naɓa zhin sai aza n ɓa zhin kwo. 16 Nyipyei ɓelo n Shekwoyi ɓei da aza nukwoyi wa, nɓa ɓemwi nukwoyi, dna n Yesu Kristi. Deye kwonu zhin Shekwoyi shiri n mi zhin waʼazi.

17 Ofye a Yahudiyi fye zhin nubwo ge ɓeho to dnalo nfye a tasin n Shekwoyi n, ntuge wo ɓei ga fye owo wyidna fyei zhin a ɓokwo, fyei gna n ge fye zhin owa nugundo manayi nu. 18 Fye kpeɓeye lo nwo ye, fye kpe ɓe nukwoyi yelo n ɓe manayi fyei gna manayi ye, ntuge aɓe ku wyidna wufye, fyei n na ɓinayi. 19 Fye kpe Shekwoyi zokwo ye lo har nfye ɓawu wyebuayi ko n bwanyi yi. Fye gye fyehin nge a fitila nu fyei wu aza zokwo n ɓa fi n wyegma, n ɓata kpe Shekwoyi ye n. 20 Fye gye ge fye ɓa mi, fya wu aza n na ɓi yi Shekwoyi zokwo, ntu ge fye kpe owo wyidna yelo n ɓa zhin ɓeyekpe n gaiciya yi nyi.

21 E, fyewu aza knunu zhin, kninu zhin to fyei wu fyehin ma? Fye gla aza ge ɓato wyivi m, fyehin fyei wyivi? 22 Fye gna ko to bmiya aza zhin anagbayi n, fyei zhin n fyehin? Fye gna ato gba ashan fyei ze agyiwye efye Shekwoyi.

23 Fye zhin aɓekwo n ge fyekpe Shekwoyi awyidna ye, ama fyei dnawo vinyikwo to fyei shi ɓa bwan. 24 Gaiciya nu n littafi a da, nge Anyi da ɓeda nukwoyi n Shekwoyi tukwo n tu n fye ɓo.

25 Ayi oza ye Yahudiyi nu kwo zhin ɓe manayi nu, n ho shi wo awyidna bwa. Ama n ho to shi ɓa bwan, ho to du aɓe nukwoyi zhinyi lo n. (Atna-kaciya zhinyi). 26 Ndei a shangbayi shi Shekwoyi awyidna bwa, Shekwoyi ta gaɓa mwa-mwa n yanci yi, n wa zhin shiri ge wa ga a Yahudiyi nyi n? 27 Ɓehin-hin ashan-gbayi ɓoku dufye a Yahudiyi, n fye kpe Shekwoyi ɓeye n mwanyi, n wo alkawali yi shinyi, to fyei shi owa wyidna bwanyin.

28 Fye to zhin a Yahudiyi hin-hin nu shifye azakwoyi zhin a Yahudiyin, kwo kuwa shifye zhin kaciyan. 29 Aʼa, Oza n wo bugba wulo cewo n Shekwoyi aba, wonu zhin Yahudiyi hin-hin. Ntuge Shewoyi ta dna aza wye nu n ɓa sa ɓa nayi yan n Kaciya zokwon, ama wo dna ozanu wye n wo bugba manayi. Oza n wo bugba do shanye kpe n wo wye-wyei mi wo ɓa bwa latu n Shekwoyi abanu, to ge n fye abam.